XX əsrin ən dəhşətli və ən qanlı faciələrindən biri olan və 1992-ci il fevral ayının 26-na keçən gecə erməni silahlı birləşmələrinin həyata keçirdikləri Xocalı soyqırımı qurbanlarının xatirəsi Azərbaycan Respublikası Prezidentinin İşlər İdarəsinin Prezident Kitabxanasında anılmışdır. Kitabxananın direktoru Mayıl Əhmədov faciənin miqyası haqqında, soyqırımı qurbanlarının xatirəsinin əbədiləşdirilməsi və tanıdılması istiqamətində dövlət səviyyəsində görülən işlər haqqında ətraflı məlumat vermişdir. Prezident Kitabxanasında Azərbaycan, ingilis və rus dillərində hazırlanan və 6 bölmədə qruplaşdırılan "XX əsrin faciəsi – Xocalı soyqırımı" adlı tammətnli elektron nəşrinin ən çox oxucu istifadəçisi olduğunu diqqətə çatdırmışdır. Kitabxananın şöbə müdiri, tarix üzrə fəlsəfə doktoru Nazim Mustafayev XX əsrdə ermənilərin üç dəfə - 1905, 1918-1920 və 1992-ci illərdə Xocalıda kütləvi qırğınlar törətmələri haqqında məlumat vermiş, tarixin ibrət dərslərindən nəticə çıxarmağın zəruriliyini vurğulamışdır.
Tədbirin sonunda Xocalı soyqırımından bəhs edən sənədli film nümayiş etdirilmişdir.