Das Nibelungenlied

“Das Nibelungenlied” (“Nibelunqlar”) — alman klassik qəhrəmanlıq eposunun Karl Simrock tərəfindən tərcümə edilmiş və Ştutqartda nəşr olunmuş versiyasıdır. Kitab, XIX əsr alman romantizminin tanınmış nümayəndələrindən biri olan rəssam Yulius Şnorr fon Karolsfeldin rəsmləri əsasında hazırlanmış qravürlərlə bəzədilmişdir. Zərif tərtibatı, qızılı basma ilə işlənmiş cildi və incə bədii üslubu bu nəşri dövrünün parlaq kitab sənəti nümunəsinə çevirir. Epos qədim german qəhrəmanları, sevgi, xəyanət və intiqamdan bəhs edir. Əsər orta əsr cəmiyyətinin şərəf, mərdlik və vəfa kimi dəyərlərini əks etdirir və həm alman, həm də ümumavropa ədəbiyyatı tarixində mühüm yer tutur. Bu nadir nəşr hazırda Azərbaycan Respublikasının Prezident Kitabxanasının Nadir fondunda qorunur və Avropa ədəbi irsinin dəyərli nümunələrindən biri hesab olunur.